ՀՀ Ազգային ժողովի ՀՅԴ խմբակցութեան պատգամաւոր Աղուան Վարդանեանի ելոյթը՝ 2017 Յունիս 22ին, կառավարութեան ծրագիրի քննարկման ժամանակ.
Այս կառավարութեան նախորդ՝ կարճաժամկէտ ծրագիրը բնորոշել եմ մէկ բառով՝ գործնական: Մինչեւ այսօր արուածի հիմքով՝ վերահաստատում եմ այդ գնահատականը՝ արդէն իբրեւ այս վարչապետի ու այս կառավարութեան բնութագիր:
Գործնականութիւնը այս փուլում, թերեւս, ամենապահանջուած յատկանիշն է: Երբ կատարուած է հանրային կեանքի բոլոր ոլորտների ախտաճանաչումը, երբ համատեղ ուժերով ձեւակերպուած են երկրի առջեւ ծառացած ներքին ու արտաքին դժուարագոյն մարտահրաւէրները, երբ նախանշուած է ուժեղ, մրցունակ, ազատ պետութիւն դառնալու նպատակը, ամէնօրեայ գործնական աշխատանքը այլընտրանք չունի:
Ներկայացուող ծրագիրը, անկախ տարբեր կարծիքներից, հարկ եղածից աւելի մանրակրկիտ է՝ ոլորտ առ ոլորտ յստակ, չափելի, կոնկրետ պատասխանատուութիւն ենթադրող ժամանակացոյց-անելիքներով: Քաղաքացին, քաղաքական ուժերը, ցանկութեան դէպքում, կարող են հետեւել ժամանակացոյցին եւ արածի ու չարածի հաշուետուութիւն պահանջել:
Ծրագրի առանցքը լայնամասշտաբ բարեփոխումներն են, որոնք, մեր բառապաշարով, պէտք է լինեն արմատական ու որակական:
Երկրի իրավիճակից մեկնելով՝ արմատական բարեփոխումները հանրութեան որոշ շերտերի համար կարող են նաեւ ցաւոտ լինել: Այս առումով չափազանց կարեւոր է, որ ծրագրի նշանային՝ «բարձրացնել եւ ամրապնդել արդարութեան ու վստահութեան մթնոլորտը մեր հասարակութիւնում» արտայայտութիւնը կեանքի կոչելու տեսանելի քայլեր կատարուեն:
Եթէ կառավարութիւնը կարողացաւ հանրութեան գոնէ մի մասի մօտ կոնկրետ արդիւնքներով լաւատեսութիւն, վաղուայ հանդէպ հաւատ ներշնչել, հասարակութեան առողջ հատուածը կը մասնակցի բարեփոխումներին: Առանց այդպիսի մասնակցութեան, առանց յետադարձ կապի ապահովման, ցանկացած, նոյնիսկ լաւագոյն ծրագիր դատապարտուած է:
Խօսքի եւ գործի հակասութեան ամենափոքր դրսեւորումը, ինչը գրեթէ միշտ բնորոշ է եղել մեր իրականութեանը, քաղաքացին արձանագրում է ու պետութեան, իշխանութեան հանդէպ վերաբերմունք ճշդում: Բացասական վերաբերմունք՝ բոլոր հետեւանքներով: Կառավարութիւնից պահանջում եմ յատուկ ուշադրութիւն դարձնել այս հանգամանքին:
Ասում էք՝ կոռուպցիայի, մենաշնորհների դէմ պայքարելու էք, պէտք է գործնական քայլերով ապացուցէք: Ասում էք՝ արտօնեալներ, հովանաւորեալներ չեն լինելու, ասում էք՝ հաւասար մրցակցային պայմաններ էք ապահովելու, օրէնքը տարածուելու է բոլորի վրայ, հարկային-մաքսային մարմինները անկողմնակալ են լինելու, իրաւապահները ծառայելու են ոչ թէ իշխանութեանը, այլ՝ քաղաքացուն, դարձեալ պէտք է գործնականում ապացուցէք: Շոուները (ցուցադրական երեւոյթները-Խմբ.), խարդաւանքները, մամուլով ներիշխանական շանտաժները վիճակ չեն փոխելու:
Կոնկրետ մարդը պէտք է տեսնի իր հանդէպ պետական մարմինների, պաշտօնեաների վերաբերմունքի էական տարբերութիւն: Հանրային ծառայողի նոր վարքականոն է պէտք պարտադրել, նոր մօտեցումներից բխող կադրային քաղաքականութեամբ: Ապրիլեան օրերից յետոյ ասել եմ՝ այսպիսի ժողովուրդը այլ վերաբերմունքի է արժանի:
Առարկայական, բովանդակային քննարկումից խուսափողներ միշտ են լինելու: Բայց ե՛ւ նրանց, ե՛ւ հանրութեան համար հարկ եմ համարում ծրագրից մէջբերել մի քանի բանալի արտայայտութիւններ. «հասարակութիւնում շրջանառուող առաջադէմ գաղափարներ», «անվտանգ, արդար, ազատ, խելացի Հայաստան», «կիրթ, մոտիվացուած, շարժունակ աշխատուժ», «ներքին ռեսուրսների արդիւնաւէտ եւ խելացի օգտագործում», «Հայաստանի թուային օրակարգ», «Սփիւռքահայութեան եւ Հայրենիքի ամուր կապի ստեղծման բանաձեւ», «ազգ-բանակ», «արտահանումը՝ 40-45 տոկոս», «կապիտալ ծախսերի աստիճանական աւելացում», «արտաքին պարտքի կայունութիւն», «հարկեր-ՀՆԱ յարաբերակցութեան 2.5 տոկոս աճ», «տարեկան 3 միլիոն զբօսաշրջիկ», «պարէնի ինքնաբաւութիւնը՝ մինչեւ 75 տոկոս», «ուսուցիչների վարձատրութեան, խրախուսման նոր մեխանիզմներ», «բազմազաւակ ընտանիքների աջակցութեան նոր օրէնք»:
Այս ամէնի հիմքում, տեղեակ ենք, նախապատրաստուած ծրագրեր կան: Բայց դրանք կեանքի կոչելու համար այս կառավարութեանը, այս վարչապետին ամէնից աւելի վճռականութիւն է անհրաժեշտ: Սկսածը մինչեւ վերջ տանելու, ոչնչի առջեւ կանգ չառնելու վճռականութիւն:
Նախկինում մենք կառավարութեան աւելի յաւակնոտ ծրագիր էլ ենք ունեցել: Բայց այն, կարծում եմ, ձախողուել է ոչ միայն համաշխարհային ֆինանսատնտեսական ճգնաժամի, այլեւ անվճռականութեան ու յարմարուողականութեան պատճառով:
Գործով, առանց աջուձախ նայելու առաջ գնալը, համոզուած եմ, այլընտրանք չունի: Այդ դէպքում ա՛յս կառավարութիւնը կը շարունակի վայելել Դաշնակցութեան ամբողջական աջակցութիւնը:
Հիմա էլ խանգարողներ լինելու են, անցեալի անցքերից մտնել փորձողներ լինելու են, քաղաքական կեանքի սեւ խոռոչը ինքնաբաւարարմամբ հինգ տարում էլ նոր բան չի ծնելու: 2018ի քաղաքական կեղծ օրակարգը թէժացնողներ լինելու են:
Ներեցէք, որ հարցնում եմ, բայց ձեզ համար ի՞նչ տարբերութիւն, թէ ով է լինելու վարչապետ: Ձեր մօտեցումները դրանից փոխուելո՞ւ են: Արտակ Զէյնալեանը սոցիալիստ-պահպանողակա՞ն է դառնալու: Ինն ամիս համբերէք, հարցեր չեն մնայ:
Յարգելի գործընկերներ,
Սա մեր կառավարութիւնն է, մեր ծրագիրն է, եւ մենք հետեւողականօրէն գնալու ենք երկիրը արմատական, որակական փոփոխութիւնների տանող ճանապարհով:
Իմ համոզմամբ, նոր սկիզբը դրուած է: Մնում է աշխատանքով քայլ առ քայլ Հայաստանը դարձնել արդար, անվտանգ, զարգացող պետութիւն:
Զուտ հայկական պետութիւն:
