27 Յուլիսին, Արամ Մանուկեանի յուշարձանին դիմաց ՀՅԴ Հայաստանի Երիտասարդական միութիւնը (ՀԵՄ) կազմակերպեց ոգեկոչումի ձեռնարկ մը՝ նուիրուած Լիզպոնի գործողութեան 5 հերոսներուն` Վաչէ Տաղլեանի, Սեդրակ Աճէմեանի, Սիմոն Եահնիեանի, Արա Քրճըլեանի եւ Սարգիս Աբրահամեանի անձնազոհութեան 41րդ տարելիցին:
ՀՅԴ ՀԵՄի Կեդրոնական վարչութեան ներկայացուցիչ Սեւակ Նազարեան անդրադարձաւ Լիզպոնի գործողութեան կարեւորութեան, անոր պարունակած խորհուրդին եւ ներկայ սերունդին փոխանցած պատգամին: Ան շեշտեց, որ 41 տարի առաջ, Լիզպոնի մէջ կատարուած գործողութիւնը տուեալ ժամանակաշրջանին մէջ իր տեսակով եղաւ բացառիկ եւ կրցաւ շրջադարձային կշիռ ունենալ հայ ժողովուրդի կեանքին մէջ: Անկէ ետք եւ մինչեւ այսօր, Սփիւռքի եւ Հայաստանի մէջ կ՛ոգեկոչուի նուիրեալ հինգ տղոց յիշատակը, նոյնիսկ մտաւորականներ Հայաստանի մէջ անդրադարձած են անոնց ներկայացուցած արժէքին:
Նազարեան դիտել տուաւ, որ զինեալ պայքարի պատմութեան մէջ Լիզպոնի գործողութիւնը ունի իր ինքնուրոյնութիւնը, որովհետեւ անիկա մարմնաւորումը եղաւ զոհաբերութեան գագաթնակէտին, երբ Հայաստանը չտեսած, սակայն իրենց ստացած դաստիարակութեամբ Հայաստանով ապրած 5 հայ երիտասարդներ իրենց ամէնէն թանկագինը՝ կեանքը, նուիրեցին հայութեան եւ Հայ Դատին: Ան շեշտեց, որ նոյն այդ զոհաբերութեան ոգին է, որ երիտասարդներ առաջնորդեց Արցախ` ազատագրելու զայն, պայքարելու սուրբ հողին համար:
Նազարեան նաեւ անդրադարձաւ մերօրեայ կեանքին եւ պայմաններուն` դիտել տալով, որ այսօր եւս մեծ թիւով երիտասարդներ` Հայաստանի մէջ թէ Սփիւռքի, կը ներշնչուին եւ ազգային դաստիարակութիւն կը ստանան Լիզպոնի հերոսներու գաղափարներէն ու գործած արարքէն: Ան շեշտեց, որ իւրաքանչիւր ժամանակաշրջան ունի իր պայքարի ձեւերը, այսօր եւս երիտասարդութիւնը կոչուած է ամէնէն լաւ եւ ճիշդ ձեւը գտնելու, որպէսզի արժանի ժառանգորդները ըլլայ նուիրեալ բազմաթիւ հայորդիներու, յատկապէս Լիզպոնի տղոց, որոնց գաղափարներով պէտք է զօրանալ եւ շարունակել անոնց ուղին` մնալով պահանջատէր, հաւատարիմ հայութեան եւ Հայ Դատին:
Ձեռնարկին ընթացքին հնչեց Լիզպոնի գործողութեան նահատակ տղոց յիշատակի` «Ահա այսպէս արշաւեցիք, Լիզպոն զոհուած լաւ ընկերներ» երգը, ապա ցուցադրուեցաւ Լիզպոնի գործողութիւնը ներկայացնող տեսերիզ մը:
Նշենք, որ նոյն օրը առաւօտեան Սուրբ Աննա եկեղեցւոյ մէջ կատարուեցաւ հոգեհանգստեան արարողութիւն մը` ի յիշատակ Լիզպոնի հերոսներուն: