ԵՐԵՒԱՆ, «Արմէնփրէս».- Վարչապետ Նիկոլ Փաշինեան շնորհաւորական հետեւեալ ուղերձը յղեց Մայրութեան եւ գեղեկցութեան տօնին առիթով` յայտնելով, թէ համոզուած է, որ դժուար օրերուն զուգադիպող այս տօնը կը խորհրդանշէ Հայաստանի ապագայ յաղթանակները.
«Սրտանց շնորհաւորում եմ ձեզ Մայրութեան եւ գեղեցկութեան տօնի առիթով: Այս գեղեցիկ տօնը դիմաւորում ենք դժուարութիւնների, տագնապների, անորոշութիւնների ժամանակաշրջանում:
«Այսօր բազմաթիւ մայրեր, դուստրեր, կանայք, քոյրեր` իրենց ուսերին կրում են վերահաս ճգնաժամի պատճառով առաջացած տնտեսական, հոգեբանական, կենցաղային դժուարութիւններ՝ յայտնուելով անսպասելի մարտահրաւէրների յանդիման:
«Շատ դէպքերում ճգնաժամի պատճառով աւելի են սրուել նախկինում գոյութիւն ունեցած խնդիրներն ու բարդութիւնները` բազմաթիւ մայրերի, դուստրերի, կանանց ու քոյրերի դնելով առանձնայատուկ խոցելի վիճակում եւ կառավարութիւնն այս օրերին ամէնօրեայ աշխատանքով ջանքեր է գործադրում ճգնաժամի բերած դժուարութիւնները յաղթահարելու համար: Բայց առաւել եւս այս պայմաններում հարկ եմ համարում ընդգծել` մայրութիւնն ու գեղեցկութիւնը մեզ համար միայն գորովանքի ու հիացումի առարկայ չեն:
«Մենք հաւատում ենք, որ նաեւ մայրութեան ուժն ու գեղեցկութեան էներգիան (ներուժը-Խմբ.) են օգնելու յաղթահարել ընթացիկ այս ճգնաժամը:
«Մայրութիւնն ու գեղեցկութիւնը նաեւ առաջնորդութեան յատկանիշներ են եւ մենք այսօր փառաբանում ենք մայրութեան եւ գեղեցկութեան ստեղծարար ուժը, համախմբելու էներգիան, առաջ մղելու յատկութիւնը:
«Այսօր բազմաթիւ բուժաշխատող մայրեր, դուստրեր, կանայք, քոյրեր պայքար են մղում կորոնավիրուսի դէմ: Բազմաթիւ մայրեր, դուստրեր, կանայք, քոյրեր հեռավար կրթութեան պայմաններում շարունակում են ուսուցչական իրենց առաքելութիւնը: Բազմաթիւ մայրեր, դուստրեր, կանայք, քոյրեր ամէնօրեայ աշխատանքով ապահովում են մեր պետական, տնտեսական ու հանրային կենսագործունէութիւնը:
«Մայրութիւնը եւ գեղեցկութիւնը յաղթանակի խորհրդանիշներ են: Եւ համոզուած եմ` դժուար օրերի հետ համընկած այս տօնը խորհրդանշում է մեր ապագայ յաղթանակները:
«Սիրելի՛ մայրեր, դուստրեր, կանայք, քոյրեր` Հայաստանի Հանրապետութեան հպարտ քաղաքացիներ, սիրում ենք ձեզ, հպարտանում ենք ձեզանով եւ խոնարհւում ենք ձեր առաջ»:
