ԱԲՕ ՊՈՂԻԿԵԱՆ
Այսօրուան «Ասպարէզ»ի երկրորդ էջով լոյս տեսած է «Ազատութիւն» կայանի թղթակիցներու հարցազրոյցը Հայաստանի արտաքին գործոց նախարար Էդուարդ Նալբանդեանի հետ՝ հայ-թրքական յարաբերութիւններու եւ Ղարաբաղեան հարցին վերաբերեալ:
Հարցազրոյզը ամբողջութեամբ ներկայացուած է այն նկատառումով, որ արծարծուած հարցերը վերջին շրջանի մեր գլխաւոր իրադարձութեանց շուրջ կեդրոնացած են եւ որոնց վերաբերեալ պաշտօնական Երեւանի դիրքորոշումները եւ պարզաբանումները վստահաբար ունին իրենց շահեկանութիւնը:
Նախարարը իր պատասխաններուն մէջ քանիցս մեղադրած է զինք ու իր ջատագոված քաղաքականութիւնը մեղադրողները, թէ՝ անոնք ուշադիր չեն եղած իր այս կամ այն յայտարարութիւններուն, կամ չեն կարդացած այս կամ այն փաստաթուղթը:
Նախարարը մերժած է պատասխանատուութիւնը վերցնել Հայկական Ցեղասպանութեան միջազգային ճանաչման աշխատանքներու ընթացքը խափանելու կամ դժուարացնելու մեղադրանքներուն, յայտարարելով, որ Հայկական Ցեղասպանութեան միջազգային ճանաչման հարցը, ինչպէս նախկին նախագահ Ռոպերթ Քոչարեանի օրօք, այսօր ալ նոյնպէս կը մնայ նախագահ Սերժ Սարգսեանի արտաքին քաղաքականութեան առանցքային կէտերէն մէկը:
Եթէ այդպէս է, պէտք է գլխարկ հանել Նալբանդեանի ու իր վարած քաղաքականութեան առջեւ, որ Հայկական Ցեղասպանութեան միջազգային ճանաչման գործընթացը պահելով հանդերձ իր առանցքային դիրքին վրայ, յաջողած է համոզել Թուրքիոյ միամիտ դիւանագէտները սեղանի շուրջ նստիլ եւ երկու երկիրներուն յարաբերութիւններու կարգաւորման ու սահմաններու բացման գծով բանակցութիւններ վարել՝ առանց նախապայմաններու, առանց այլ հարցերու հետ առնչուող քննարկումներ կատարելու:
Այս հաստատումը ինքնին բաւարար հիմք պէտք է ըլլայ նախարարի պարզաբանումները գնահատելու: Կարդացէք եւ դուք եզրակացուցէք, որ նախարարին ուղղուած մեղադրանքնե՞րն են անհեթեթ, թէ այս երկարապատում հարցազրոյցին մէջ տեղ գտած արդարացումները:
ays hiamar’e mezi echou degh tradz e
Anhetetoutyounneru magartag g’ounenen. Ays megu nakhararagan magartagi e. Ga anshoushd aveli partsurn al; nakhakahagan magartagi anhetetoutyounu. Tjpakhdoutyounu ayn e, vor asonk sev geder gu toghoun mer badmoutyan ou TADi hedabntman jampoun vra.