«Մենք Թոյլ Չենք Տալու, Որ Գլենդելում Որեւէ Անձ Կամ Կազմակերպութիւն Վիրաւորի  Մեր Համայնքին»

ՀԱՐՑԱԶՐՈՅՑ ԳԼԵՆԴԵԼԻ ՔԱՂԱՔԱՊԵՏ ՎԱՐԴԱՆ ԿԱՐԱՊԵՏԵԱՆԻ ՀԵՏ

Վարեց՝ ՆԱՆԷ ԱՒԱԳԵԱՆ

ՆԱՆԷ ԱՒԱԳԵԱՆ.- Պրն. Կարապետեան, Սեպտեմբերի սկզբին հրդեհները մեծ սպառնալիք էին ներկայացնում նաեւ Գլենդելի բնակիչների համար: Քաղաքապետարանի տարբեր բաժանմունքների աշխատակիցների արհեստավարժ եւ համակարգուած աշխատանքի շնորհիւ նաեւ, հնարաւոր եղաւ խուսափել մեծածաւալ վնասներից: Ինչպէ՞ս յաջողուեց դիմակայել նման կարգի հրդեհի:

 ՎԱՐԴԱՆ ԿԱՐԱՊԵՏԵԱՆ.- Հրդեհների արդիւնքում մեր բնակիչները որեւէ ձեւով չտուժեցին, տներ չհրդեհուեցին: Դա հնարաւոր դարձաւ կազմակերպուած մօտեցման շնորհիւ: Հրդեհները սկսուելուն պէս մեր արտակարգ իրավիճակների կենտրոնն անմիջապէս արձագանգեց, եւ քաղաքապետարանի հրշէջ, ոստիկանական, ծրագրաւորման, այգիների հարցերով բաժանմունքների տնօրէններն ու աշխատակիցները միասին արագօրէն մշակեցին գործողութիւնների ծրագիրը, եւ  Լոս Անջելեսի մարզի ու քաղաքապետարանի, Օրենջ Քաունթիի, Թորենսի եւ այլ քաղաքների հրշէջ ծառայութիւնների հետ համագործակցութեան ձեւերը:  Ներկայացնեմ նաեւ որոշ թուեր, որոնք հանրութեանը կը տեղեկացնեն, թէ ի՛նչ միջոցների կարիք է զգացւում նման դէպքերի ժամանակ: Վերջերս պատահած հրդեհների դէմ պայքարում ներգրաւուած էին շուրջ 1060 հրշէջ, 209 հրշէջ մեքենայ, 11 ուղղաթիռ, 4 (DC10) ինքնաթիռ, որոնք շուրջ 33 հազար գալոն քիմիական նիւթ են տեղափոխել, եւ դրանցով օղակ է ձեւաւորուել հրդեհուող տարածքների շուրջ, որ կրակը այդ սահմաններից դուրս չանցնի: Եթէ նման կարգի միջոցառումներ ձեռք չառնէինք, հրդեհը շատ արագ կը տարածուէր՝ կլանելով շրջակայ բնակելի տները: Միաժամանակ, պարտադիր տարհանման ենթակայ երկու թաղամասերում, մարդկանց հեռանալուց յետոյ, մեր ոստիկանական ծառայութիւնը շուրջօրեայ հսկողութիւն էր իրականացնում, որպէսզի որեւէ դէպք, օրինակ՝ գողութիւն չլինի:

Շատ հպարտ եմ Գլենդելի տարբեր ծառայութիւնների աշխատանքով եւ մեր աշխատակիցների պատրաստուածութեան մակարդակով: Սա եւս մէկ անգամ վկայեց, թէ ինչի արդիւնքում, է, որ Գլենդելը երրորդ ամենաապահով քաղաքն է Կալիֆորնիայում եւ հինգերորդը՝ Միացեալ Նահանգներում: Այս հարցում կը ցանկանայի ընդգծել նաեւ մեր բարեխիղճ ու օրինապահ բնակիչների դերը:

 ՆԱՆԷ ԱՒԱԳԵԱՆ.- Անդրադառնանք անմիջականօրէն հայ համայնքին առնչուող մի միջադէպի: Անցեալ ամիս, Գլենդելի «Ամերիկանա» հրապարակի ղեկավարութիւնը հրաժարուեց տեղադրել Հայոց Ցեղասպանութեան մասին վաւերագրական շարժապատկերի պաստառներն իր տարածքում՝ պատճառաբանելով, թէ հարցը քաղաքական է, եւ իրենք այդ մասին քննարկել են թուրքական կողմի հետ: Գլենդելի քաղխորհրդի միջամտութեամբ էր նաեւ, որ «Ամերիկանա»ի ղեկավարները ներողութիւն յայտնեցին եւ թոյլ տուեցին պաստառների տեղադրումը: Հայոց Ցեղասպանութեան նկատմամբ նման վերաբերմունքը «Ամերիկանա»ի ղեկավարների կողմից առաջին անգամը չէ: Ի՞նչ քայլեր է պատրաստւում ձեռնարկել քաղխորհուրդը, ի դէմ ձեզ, որպէսզի Գլենդելում գործող նշուած ընկերութիւնը այսուհետ կշռադատուած մօտեցում ցուցաբերի հայ համայնքին առնչուող հարցերին:

 ՎԱՐԴԱՆ ԿԱՐԱՊԵՏԵԱՆ.- «Ամերիկանա»ն անձնական բիզնես է, եւ նրանք շատ վիրաւորական մօտեցում ցուցաբերեցին Հայոց Ցեղասպանութեան հարցին: Կարող էին օրէնք մէջբերելով հրաժարուել իրենց տարածքում պաստառների տեղադրումից, բայց փոխարէնն ընտրեցին այլ ճանապարհ, իսկ երբ նշեցին, որ այս հարցով խօսել են նաեւ Թուրքիայի հիւպատոսութեան հետ՝ անցան բոլոր սահմանները: Մենք չենք թոյլ տալու, որպէսզի Գլենդելում որեւէ անձ կամ կազմակերպութիւն վիրաւորի մեր համայնքին: Ստեղծուած իրավիճակին արձագանգեց նաեւ Գլենդելի Հայ Դատի յանձնախումբը, անհատներ, եւ միացեալ ուժերով ապտակեցինք «Ամերիկանա»ի ղեկավարութեանը: Իրենք պէտք է գիտակցեն, որ այս քաղաքի բիզնես քաղաքացիներն են, եւ մասն են կազմում մի քաղաքի, որի շուրջ յիսուն տոկոսն ամերիկահայեր են: Մենք ունենք պահանջներ, եւ մեր հարցը, որ հարիւր տարուց աւելի ազդել է մեր համայնքի վրայ, մեր պատմութեան մասն է՝ իրենք պէտք է յարգանքով մօտենան, եւ իրենց համար պէտք է կարեւոր լինի:

Ապրիլի 24ին մի լուսանկար էր տեղադրուել համացանցում, որտեղ ներկայացուած էր «Ամերիկանա»ն՝ դատարկ ու մակագրուած էր՝ «Հայ սպառողի ուժը»: Սա շատ լաւ փաստ է, որ «Ամերիկանա»ի ղեկավարներին մտածելու առիթ պէտք է տայ:  Ապագայում իրենք պէտք է համագործակցեն մեր համայնքի հետ ոչ միայն որպէս լաւ հարեւան, այլեւ՝ օգնեն ոչ շահութաբեր կազմակերպութիւններին ու միութիւններին, ինչպէս այս քաղաքում բոլորն են անում: Իրենք այս պատգամներն արդէն ստացել են մեզանից:

 ՆԱՆԷ ԱՒԱԳԵԱՆ.- Պրն. Կարապետեան, լրանում է որպէս քաղաքապետ ձեր պաշտօնավարման չորս ամիսը: Մասնաւորապէս, կը խնդրէի տեղեկացնէիք, թէ ի՞նչ աշխատանքներ են տարւում Գլենդելում բնակարանների վարձերը վերահսկելու ուղղութեամբ:

 ՎԱՐԴԱՆ ԿԱՐԱՊԵՏԵԱՆ.- Աշխատում եմ իրականացնել խոստումներս, որ տուել եմ նախընտրական շրջանում: Ընթացքի մէջ է Գլենդելի Միացեալ կրթաշրջանի հետ համատեղ մեր ծրագիրը, ըստ որի, դպրոցներին պատկանող խաղադաշտերը, դասերի աւարտից յետոյ, բացւում են հանրութեան համար:

Տանտէրերի կողմից վարձերի յաճախակի բարձրացումը կանխելու նպատակով Գլենդելում աշխատանքներ են տարւում երկու ուղղութեամբ: Ես առաջարկել եմ օրինագիծ, ըստ որի՝ տանտէրերը չեն կարող վարձով տուած բնակարանների գները մէկ տարուայ ընթացքում մի քանի անգամ բարձրացնել եւ պէտք է վարձակալի հետ մէկ տարուայ պարտադիր պայմանագիր կնքեն: Դրանից յետոյ, յաջորդ երկու տարուայ համար տանտէրը պէտք է առաջարկի արժէքի բարձրացման տարբերակներ, ինչի արդիւնքում բնակիչը նախապէս տեղեակ է լինում իր առաջիկայ երեք տարիների վարձի չափից: Այս ժամկէտը լրանալուց չորս ամիս առաջ, տանտէրը տեղեկագիր է ուղարկում, թէ որքան է պատրաստւում բարձրացնել վարձը յետագայ տարիներին, եւ եթէ բնակիչը չի ընդունում պայմանները, նրան չորս ամիս ժամանակ է տրւում նոր բնակարան փնտռելու համար: Այսպէս աւելի կանխատեսելի է դառնում վարձակալի կարգավիճակը:

 ՆԱՆԷ ԱՒԱԳԵԱՆ.- Ե՞րբ էք նախատեսում օրինագիծը ներկայացել քաղխորհդի քուէարկութեանը, եւ որքա՞ն է այն ընդունելու հաւանականութիւնը: Կարծում եմ, Հոկտեմբերի վերջին կամ Նոյեմբերին քաղխորհրդում քուէարկութեան կը դրուի այս օրինագիծը: Ցանկանում եմ ընդգծել, որ այս հարցում չափազանց կարեւոր է Գլենդելի բնակիչների մասնակցութիւնը: Առանց բնակիչների, առանց համայնքի չենք կարող այս օրէնքն ընդունել:

 ՎԱՐԴԱՆ ԿԱՐԱՊԵՏԵԱՆ.- Այս հարցի շուրջ մեր բնակիչների, հայ համայնքի կարծիքը լսելու համար, քաղաքապետարանը երկու հանդիպում էր կազմակերպել՝ նախապէս տեղեկացնելով հայկական տարբեր լրատուամիջոցներով, թռուցիկներ էին բաժանուել: Մենք հրաւիրել էինք քաղաքապետարանի կառավարչին, փաստաբանին, հանրային աշխատանքների հարցերով համակարգողին, հայ թարգմանիչներ, եւ հայերէն տեղեկագրեր էին պատրաստուել: Սակայն, ցաւօք, ոչ ոք չներկայացաւ: Միաժամանակ, կողքի սրահում ներկայացել էին տանտէրեր եւ բողոքում էին, որ խնդիրներ իրականում չկան, բնակիչները դժգոհ չեն, եւ որ վարձերի հետ կապուած մեր մտահոգոթիւնները տեղին չեն: Քուէարկութեան օրը ցանկալի չէր լինի նման իրավիճակ, ուստի յորդորում եմ, որ յատկապէս անբարեխիղճ տանտէրերի վերաբերմունքից տուժած մեր քաղաքացիները ներկայանան քաղխորհրդի նիստին եւ իրենց  մտահոգութիւնները յայտնեն այս հարցի շուրջ քուէարկութիւնից առաջ:

Վարձերի նկատմամբ վերահսկողութիւն (rent control) սահմանելու ուղղութեամբ էլ մի խումբ է ստեղծուել, որ ստորագրահաւաք է կազմակերպել, որպէսզի ժողովուրդը որոշի, թէ արդեօք նման օրէնք անհրաժե՞շտ է ընդունել, թէ ոչ: Ես հանդիպել եմ այդ խմբի հետ, եւ նրանք էլ յայտնեցին, որ, օրինակ, «Սեքշըն 8» ծրագրի շահառուները չեն ցանկանում ստորագրել, մեկնաբանելով, որ դա իրենց չի վերաբերւում: Կարծում եմ, սա ճիշդ մօտեցում չէ, որովհետեւ այդ հարցը, եթէ անձամբ տուեալ անձին չի վերաբերւում, ազդում է նրա հարեւանի, բարեկամի վրայ: Եթէ ցանկանում ենք, որ վարձերի վերահսկողութեան մասին օրէնք ընդունուի, պէտք է ակտիւօրէն մասնակցել ստորագրահաւաքի, որպէսզի դրուի համաժողովրական քուէարկութեան յաջորդ տարի կամ՝ 2019ին:

Միակ բանը, որ ժողովրդից ակնկալում ենք՝ ակտիւութիւն, քանի որ ցանկանում ենք,  որ մեր աշխատանքը ներառի այն բոլոր հարցերը, որոնք վերաբերւում են, մտահոգում են մեր համայնքին:

 ՆԱՆԷ ԱՒԱԳԵԱՆ.- Ինչպէ՞ս է ընթանում մատչելի բնակարանների տրամադրման գործընթացը:

 ՎԱՐԴԱՆ ԿԱՐԱՊԵՏԵԱՆ.- Մատչելի բնակարանների կառուցման գումարը տրամադրւում է նահանգի կողմից, եւ երբ դիմում ենք, պէտք է անպայման նշենք, թէ ինչ նպատակով եւ ում համար է կառուցուելու: Վերջերս 43 բնակարան տրամադրեցինք վետերաններին, 70ը՝ արուեստագէտներին: Ի դէպ, այս շէնքի շուրջ խնդիր կար՝ բաւական ընդլայնուած էր ներկայացուած արուեստագէտ բնորոշումը, ինչը թիւրըմբռնում էր առաջացրել դիմորդների շրջանում: Իմ ընտրուելուց յետոյ, երբ քաղխորհրդի հինգ անդամներից երեքն այլեւս ամերիկահայեր էինք, կարողացանք  քաղխորհրդի անդամներ Զարեհ Սինանեանի ու Արա Աբրահամեանի հետ միասին մեծամասնութեամբ կոնկրետացնել բնորոշումը: Արդիւնքում, այդ շէնքի բնակիչների գրեթէ կէսն այսօր հայեր են: Շուտով կը սկուի Սոնորա եւ Հինգերորդ փողոցների հատման կէտում 70 մատչելի բնակարանների կառուցումը:

Այս նախագծերը երկար են տեւում, որովհետեւ ֆինանսներ ստանալու համար, տարուայ մէջ միայն մէկ անգամ կարող ենք դիմել նահանգին: 18 միլիոն դոլար ակնկալում ենք ստանալ երկու-երեք տարուայ ընթացքում:

 ՆԱՆԷ ԱՒԱԳԵԱՆ.- Ձեր նշած գումարով քանի՞ մարդ կարող է ստանալ մատչելի բնակարան:

 ՎԱՐԴԱՆ ԿԱՐԱՊԵՏԵԱՆ.- 70 բնակարանի համար մենք վեց միլիոն դոլարի ներդրում էինք կատարել, ինչը շատ լաւ արդիւնք է: Գլենդելում գները բարձր են, ընդհանուր Կալիֆորնիայում շինարարութիւնը շատ թանկ է, բայց փորձում ենք մեզ բաժին հասած գումարով,  հնարաւորինս շատ նախագիծ իրականացնել:

 ՆԱՆԷ ԱՒԱԳԵԱՆ.- Գլենդելում վերջին շրջանում մեծ ծաւալով շինարարական աշխատանքներ են ընթանում, յատկապէս կենտրոնում: Քաղաքի զարգացման աշխատանքներն արդեօք համաչա՞փ են ընթանում, կա՞ն ծրագրեր նաեւ հարաւային Գլենդելի զարգացման ուղղութեամբ:

 ՎԱՐԴԱՆ ԿԱՐԱՊԵՏԵԱՆ.- Հարաւային Գլենդելի զարգացման հարցում մենք ցանկանում ենք լսել ժողովրդի կարծիքը, եւ, այս հարցում եւս, ակնկալում ենք մեր համայնքի ակտիւ մասնակցութիւնը: Ես չեմ ցանկանում, որ այն, ինչ պատահեց Սենթրալ պողոտայում, շարունակուի նաեւ Գլենդել պողոտայում, քաղաքի հարաւային մասում:

 ՆԱՆԷ ԱՒԱԳԵԱՆ.- Ի՞նչ նկատի ունէք:

 ՎԱՐԴԱՆ ԿԱՐԱՊԵՏԵԱՆ.- Սենթրալ պողոտայում կառուցուող շինութիւնները, իմ կարծիքով, չեն կառուցւում Գլենդելի բնակիչների համար: Այս մասին, ես յայտարարել եմ նախընտրական շրջանում, եւ այժմ էլ՝ իմ խօսքը չի փոխուել: Երբ ինձ հարցնում են, թէ ինչպիսի՞ շինարարութեան կ՛աջակցեմ, միշտ ասում եմ, որ կը խրախուսեմ այնպիսի բնակարանների կառուցումը, որոնք նախատեսուած են նաեւ ընտանիքների համար, այսինքն՝ երկու, երեք սենեականոցներ: Ես համաձայն չեմ 500-600 ֆութ քառակուսի տարածքով, մէկ ննջասենեակով հարիւրաւոր բնակարանների կառուցմանը:

Քաղաքի հարաւային հատուածում ներկայում բազմասենեականոց տներ են, եւ այստեղ ընտանիքները շատ են, եւ այդ միտումը պէտք է լինի այս շրջանի վերակառուցման հիմքում: Իւրաքանչիւր շէնք պէտք է ունենայ մէկ, երկու, երեք սենեականոց բնակարաններ՝ նախատեսուած բոլորի համար, եւ ոչ թէ բնակարանի փոքրացման հաշուին քանակը աւելացնեն, ինչն անում են ներկայում: Դա նոյնիսկ մենակ բնակուող երիտասարդների համար յարմար չէ: Այդ պատճառով, ցանկանում եմ, որ հարաւային Գլենդելն այնպէս ձեւաւորուի, որ յարմար լինի բոլորին՝ յատկապէս այս շրջանում զգալի թիւ կազմող ցածր եկամուտ ունեցող բնակիչներին: Միաժամանակ, նախատեսւում է աւելացնել փոխադրական միջոցների թիւը եւ դրանք հնարաւորինս մօտեցնել բնակելի հատուածներին, որպէսզի մարդիկ աւելի քիչ կարիք ունենան մեքենայի, եւ այսպիսով նաեւ խցանումների ու կայանատեղիների հարցը կը լուծուի: Ուզում եմ ստեղծենք այնպիսի միջավայր, որ մեր երեխաները ցանկանան եւ հնարաւորութիւն ունենան ապրելու Գլենդելում:

 ՆԱՆԷ ԱՒԱԳԵԱՆ.- Դուք բազմիցս նշել էք նաեւ Գլենդելում գործարարների համար բարենպաստ միջավայրը զարգացելու անհրաժեշտութեան մասին: Դիւրացուե՞լ է արդեօք արտօնագրերի տրամադրման գործընթացը, տրամադրո՞ւմ էք արտօնութիւններ սկսնակ գործատէրերին, եւ յատկապէս ի՞նչ ոլորտների բիզնեսներ են վերջերս ստեղծուել Գլենդելում:

 ՎԱՐԴԱՆ ԿԱՐԱՊԵՏԵԱՆ.- Գլենդելում գործում է շուրջ տասը հազար փոքր եւ միջին բիզնես, որոնցից աւելի քան վեց հազարը պատկանում է հայերի: Սա այն պարագայում, որ Միացեալ Նահանգներում, ընդհանուր առմամբ, փոքր բիզնեսում է ներգրաւուած աշխատուժի հիմնական 90 տոկոսը:

Քաղաքապետարանի ծրագրաւորման բաժանմունքն է զբաղւում արտօնագրերի տրամադրմամբ, եւ շարունակական աշխատանքներ ենք տանում այս գործընթացը դիւրացնելու եւ արագացնելու, բիւրոկրատական քաշքուկները կրճատելու ուղղութեամբ:

Ինչ վերաբերում է գործատէրերին աջակցելուն, այո՛, քաղաքապետարանը, հնարաւորութիւնների սահմաններում փորձում է օգնել նորաստեղծ բիզնեսներին: Աշխատում ենք նոր աշխատատեղեր բացել, ներգրաւել այնպիսի գործարարների, ովքեր պատրաստ են նաեւ բարձր աշխատավարձեր ապահովելու:

Այժմ աշխատում ենք բարձր տեխնոլոգիաների ոլորտի ընկերութիւններ ներգրաւել: Ուրախութեամբ կ՛ուզէի նշել այս ոլորտում մեծ յաջողութիւն արձանագրած մի ընկերութեան մասին, որը ստեղծել են երկու ամերիկահայ գործարար ընկերներ Գլենդելում: Մենք նրանց մի քիչ օգնեցինք, որպէսզի ցոյց տանք, որ պատրաստ ենք աջակցելու, որպէսզի մնան եւ զարգանան Գլենդելում: Ներկայում նրանք ունեն 100ից աւելի աշխատողներ, եւ այդ թիւը շուտով պատրաստւում են կրկնապատկել: Իրենք Գլենդելի անունն են նաեւ բարձրացնում, եւ կրկնակի ուրախ եմ, որ նրանք մեր հայրենակիցներն են:

 ՆԱՆԷ ԱՒԱԳԵԱՆ.- Դուք պարբերաբար այցելում էք Հայաստան, հանդիպումներ ունենում պաշտօնեաների հետ եւ փորձում էք գտնել համագործակցութեան եզրեր կամ աջակցելու ձեւեր:

ՎԱՐԴԱՆ ԿԱՐԱՊԵՏԵԱՆ.- Հայաստանում աշխատում եմ ունենալ այնպիսի հանդիպումներ, որոնք կարող են օգտակար լինել հայրենիքին: Օրեր առաջ, Հայաստանին որպէս նուէր ուղարկեցինք երկու հրշէջ մեքենայ: Այս մասին իմ առաջարկը հաստատեցին քաղխորհրդի անդամ գործընկերներս՝ կողմ քուէարկելով, այլապէս այդ մեքենաները կը վաճառուէին կամ կ՛ուղարկուէին այլ քաղաք: Գտանք մի հայ բարերարի, ով համաձայնուեց գնել դրանք՝ իրականութիւն դարձնելով մեր որոշումը: Հայաստանում վերջին շրջանում մեծածաւալ հրդեհներ եղան, եւ այս բազմագործառոյթ մեքենաները շատ օգտակար կը լինեն այնտեղ:

 ՆԱՆԷ ԱՒԱԳԵԱՆ.- Դուք նշեցիք քաղխորհրդում ձեր հայ գործընկերների մասին, ինչպէ՞ս է գործում «չորսի» ուժը:

ՎԱՐԴԱՆ ԿԱՐԱՊԵՏԵԱՆ.- Մեր հիմնանպատակն է՝ նպաստել Գլենդելի բնակիչների բարեկեցութեանը եւ քաղաքի զարգացմանը: Մեր աշխատանքային յաջողութիւններով նպաստում ենք քաղաքի գրեթէ 50 տոկոս կազմող մեր հայրենակիցների բարեկեցութեանը: Ինչ վերաբերում է մեր միջեւ յարաբերութիւններին՝ բոլորս շատ դրական ենք տրամադրուած: Ի հարկէ, լինում են հարցեր, որոնց շուրջ ունենում ենք տարաձայնութիւններ, սակայն հայ համայնքին առնչուող հարցերում մենք միահամուռ ենք, մի բռունցք ենք դառնում: Ոչ մէկս անձնական հարց չունենք եւ շատ լաւ գիտակցում ենք, թէ ինչո՛ւ ենք ընտրուել եւ ո՛ւմ միջոցով:

 ՆԱՆԷ ԱՒԱԳԵԱՆ.- Համայնքին առաւել ներգրաւելու առումով, կը ցանկանայի անդրադառնալ «Ասպարէզ» թերթի Հինգշաբթի օրուայ յատուկ համարին, որ նուիրուած է Գլենդելին: Մենք մշտապէս յետեւում ենք նաեւ քաղխորհրդի աշխատանքներին եւ փորձում հնարաւորինս իրազեկուած պահել մեր հայրենակիցներին:

 ՎԱՐԴԱՆ ԿԱՐԱՊԵՏԵԱՆ.- Թերթը տեղեկացուած լինելու առաջին միջոցն է, եւ շատ կարեւոր է, թէ ո՛ր լրատուամիջոցն է  լուրը փոխանցում: «Ասպարէզ»ն այն թերթն ու կայքն է, որն ունի տարիներով ձեռք բերուած փորձառութիւն եւ վայելում է վստահութիւն, քանի որ լուսաբանում է եւ երբեք չի տարածում արհեստական, յատուկ նպատակներով ստեղծուած լուրեր ու տեղեկութիւններ, մշտապէս անդրադառնում է հայ համայնքին յուզող հարցերին, հսկայական տեղեկատուական աշխատանք է կատարում ընտրութիւնների ժամանակ: Բարձր եմ գնահատում նաեւ քաղաքապետարանի աշխատանքները մեր համայնքին ներկայացնելու ձեր աշխատանքը: Կոչ եմ անում մեր համաքաղաքացիներին՝ դառնալ մասնակից Գլենդելի զարգացման գործում: Կան քաղաքներ, որտեղ կառավարող մարմինները չեն ցանկանում, որ բնակիչները շատ ներգրաւուեն, քանի որ այդպէս իրենց գործն է հեշտանում՝ եթէ ժողովուրդը տեղեակ չի, չեն էլ պահանջի ու բողոքի: Բայց մենք ցանկանում ենք, որ մեր բնակիչները հանդէս գան առաջարկներով, իրենց ծրագրերով, եւ միասնաբար գործենք մեր բոլորի պատկերացրած քաղաքը կերտելու ուղղութեամբ: