Յանուն Հօր եւ Որդւոյ եւ Հոգւոյն Սրբոյ. ամէն:
«Զի ծնաւ ձեզ այսօր Փրկիչ, որ է օծեալ Տէր, ի քաղաքի Դաւթի» (Ղուկ. Բ 11):
Սիրելի հաւատաւոր ժողովուրդ հայոց ի Հայրենիս եւ ի Սփիւռս,
Այսօր կրկին խնդութիւն ու բերկրանք է մեր սրտերում տօնախմբութեամբ մեր Տէր Յիսուս Քրիստոսի Սուրբ Ծննդեան եւ Աստուածայայտնութեան։ Մանուկ Յիսուսով Աստծոյ սէրը մարմին առաւ ու բնակուեց մարդկանց մէջ։ Աստուած Իր բիւր շնորհները հեղեց մարդկութեան վրայ, բոլորի համար բացեց ճանապարհը փրկութեան:
«Այսօր ձեզ համար Դաւթի քաղաքում ծնուեց մի Փրկիչ, որ օծեալ Տէրն է»: Ուրախաբեր այս լուրը աւելի քան երկու հազար տարիներ առաջ տրուեց Բեթղէհէմի հովիւներին, եւ պայծառ աստղը Բեթղէհէմի երկնքում առաջնորդեց արեւելքի մոգերին, ովքեր ելան Տիրոջը փնտռելու եւ գտան խանձարուրի մէջ պարուրուած Մանկանը ու ճանաչեցին, որ Տէրն է, Փրկիչն Աշխարհի:
Քրիստոսի Ծնունդը այսօր եւս հրաւէր է մեզ, բոլոր մարդկանց ու ժողովուրդներին՝ մոգերի ու հովիւների նմանութեամբ գնալու դէպի Փրկիչը, Մարդասէր ու Բարերար Տէրը. «Ովքեր Տիրոջն են փնտռում, նրանցից ոչ մի բարիք չի պակասելու», ասում է սաղմոսերգուն (Սաղմ. ԼԳ 11): Տիրոջը փնտռել նշանակում է ընթանալ դէպի Աստուած, ընդունել Նրա փրկարար կամքը, հետեւել Նրան։ Տիրոջը փնտռել նշանակում է հանդիպել, տեսնել Նրան մարդկանց կերակրելիս, բժշկելիս, մխիթարելիս, յոյս, հաւատ ու կեանք պարգեւելիս, կեղծիքն ու երեսպաշտութիւնը սաստելիս, մարդկանց խաղաղութեան, արդարութեան, ճշմարտութեան ուղիով առաջնորդելիս։ Այս ճանապարհներին Տիրոջը հանդիպողները զօրանալու են, նրանց սրտերը խաղաղ եւ ուրախ են լինելու, նրանք չեն տարակուսելու իրենց հաւատքում, եւ նրանց «ոչ մի բարիք չի պակասելու»։ Աստուած Միածին Իր Որդուն ի սէր մարդկանց առաքեց աշխարհ, որով եւ մարդկանց մեծագոյն օրինակը մատուցեց միմեանց հանդէպ սիրոյ, խնամքի եւ հոգածութեան, ունեցած բարիքներին միմեանց մասնակից դարձնելու եւ երկնային շնորհները յուսալու։ Ճշմարիտ, աստուածօրհնեալ այս կեանքով են ապրել արդարները, մարգարէներն ու առաքեալները, հաւատքի համար նահատակները, երանելիներն ու բարեպաշտները եւ որպէս փարոս` դարերի մէջ լուսաւորել դէպի Աստուած մարդկութեան ուղին։
Արդի դարը, որ բնորոշուում է աւելի նիւթապաշտութեամբ ու աշխարհիկութեամբ, առաւել կարիքն ունի հոգեւոր ներուժի, աներկմիտ հաւատքի, դարձի՝ դէպի Քրիստոսապատուէր հոգեւոր-բարոյական արժէքները, որոնցով իմաստաւորուում է կեանքը եւ հաստատուում իր նպատակի՝ դէպի Աստուած ընթացքի մէջ։ Յարատեւ ու մնայուն են հոգեւոր արժէքները, որոնք լուսաւորել ու զօրացրել են ժողովուրդների կեանքը, ծաղկեցրել մշակոյթները, բարեփոխել հասարակութիւնները։ Այսօր էլ առանց հոգեւորի, առանց Աստծոյ՝ ձախողման են դատապարտուած սոցիալ-տնտեսական բարեփոխումները, գիտատեխնիկական զարգացումներն ու ձեռքբերումները եւ մարդկային բոլոր ջանքերը՝ ուղղուած կեանքի առաջընթացին։ Արդարեւ, խաղաղութիւն, բարգաւաճում, բարօրութիւն եւ ամէն բարիք մարդկութիւնը ի զօրու պիտի լինի գտնել հոգեւոր-բարոյական նորոգութեամբ։ «Քանի որ ամէն բարի շնորհ եւ ամէն կատարեալ պարգեւ, ինչպէս Յակոբոս առաքեալն է ուսուցանում, վերեւից է իջած, լոյսի Հօրից» (Յակ. Ա 17):
Սիրելի բարեպաշտ հաւատացեալներ ի Հայաստան, Արցախ եւ ի Սփիւռս, մեր Հայրենիքում եւ ազգային կեանքում էլ ունենք բազմաթիւ խնդիրներ, որ կարող պիտի լինենք վճռել մեր հաւատքից բխող շնորհներով՝ միմեանց հանդէպ սիրոյ, արդարամտութեան, նուիրումի ու նախանձախնդրութեան, հայրենասիրութեան ու ազգասիրութեան ոգու զօրութեամբ։ Չերկնչենք դժուարութիւններից ու նեղութիւններից, Տէրը մեզ համար շատ տխրութիւններ է ուրախութեան փոխել, շատ յաղթանակներ մեզ պարգեւել, որոնցով այսօր քաջալեր են մեր հոգիները։
Երկիւղենք մեր պարտքի ու պատասխանատուութեան մէջ թերանալուց, կեղծիքից ու անարդարութիւնից, նոյնքան նաեւ՝ անտարբերութիւնից։ Իւրաքանչիւրս՝ պաշտօնեան իր դիրքում, զինուորականն իր ծառայութեան, հոգեւորականն իր սպասաւորութեան մէջ, հողագործն ու արտադրողը՝ իրենց աշխատանքում, ուսուցիչը, գիտնականը, բժիշկն ու արուեստագէտը՝ իրենց կոչման մէջ, լինենք առաւել ջանադիր, պատրաստ առաւել նուիրումի ու յանձնառութեան, որպէսզի բարի արգասիքներ ամբարենք եւ Տիրոջ շնորհը առատացնենք մեր կեանքում։ Ազգային եւ հոգեւոր զօրացեալ կեանքով, ամուր միասնութեամբ է, որ պիտի շէնացնենք մեր Հայրենիքը, բարօր դարձնենք մեր ժողովրդի կեանքը, աներեր պահենք մեր երկրի կայունութիւնը, աներեր՝ գալիքի հանդէպ լաւատեսութիւնը, որ մեր ժողովրդի զաւակները չհեռանան Հայրենիքից, այլ՝ վերադառնան, որ Հայրենիքում եւ Սփիւռքում բազմանան հայ ընտանիքները եւ զաւակները՝ հայոց ընտանիքներում։ Դժուարութիւնները թող արգելք չդառնան, որ հայրենի գիւղերն ու շէները բազմամարդ դառնան եւ ընտանեկան յարկերում մանուկների ճիչն ու խինդն աւելանան։ Հարստութեան, յարմարաւէտ պայմանների կամ փարթամութեան մէջ չէ, որ ծնուեց Աստծոյ Որդին։ Մեր Տէրը աշխարհ եկաւ համեստ ընտանիքում, որն ունէր յոյսն Աստծոյ եւ խոնարհութիւնը՝ Աստծոյ կամքի առաջ։ Ամէն մանկան հետ նոր յոյս է ծնուում, նոր հեռանկար՝ մեր ազգի առաջընթացի ու բարգաւաճման։ Նրանց ձեռքերում է մեր ժողովրդի գալիքը։ Նրանք պիտի շարունակեն վերածնուած մեր Հայրենիքի ազատ կեանքը, ազգերի մէջ՝ մեր ժողովրդի ուղին՝ խաղաղ ու երջանիկ, առ Աստուած յոյսով լեցուն աշխարհի աննուազ հաւատով։ Հոգանք, սիրելի ժողովուրդ հայոց, որ մեր զաւակները աճեն ու զօրանան Աստծոյ Խօսքով եւ չվտանգուեն՝ ընկնելով մեր ժողովրդին խորթ եւ օտար, հոգեսպան գաղափարախօսութիւնների թակարդը։ Հաստատենք նրանց առ Քրիստոս հաւատքի ու յոյսի մէջ, եւ Տիրոջ խոստումով՝ «կենդանի ջրերի գետեր պիտի բխեն» նրանց հոգիներում (Յովհ. Է 38), ու մարգարէի խօսքի համաձայն՝ «նրանք պիտի կոչուեն ազգ արդարութեան, տունկ՝ ի փառս Տիրոջ։ Պիտի վերաշինեն դարաւոր աւերակները, նախկինում աւերուածները պիտի վերաշինեն եւ նորոգեն դարերից ի վեր փլուած քաղաքները» (Ես. ԿԱ 3-4)։
Սուրբ Ծննդեան եւ Աստուածայայտնութեան տօնի հոգենորոգ առիթով Քրիստոսաւանդ սիրով ողջունում ենք Առաքելական մեր Սուրբ Եկեղեցու Նուիրապետական Աթոռների Գահակալներին՝ ՆՍՕՏՏ Արամ Ա. Մեծի Տանն Կիլիկիոյ Կաթողիկոսին, Երուսաղէմի Հայոց Պատրիարք Ամենապատիւ Տ. Թորգոմ Արքեպիսկոպոս Մանուկեանին, Կոստանդնուպոլսի Հայոց Պատրիարք Ամենապատիւ Տ. Մեսրոպ Արքեպիսկոպոս Մութաֆեանին, Հայաստանի Հանրապետութեան Նախագահ Տիար Սերժ Սարգսեանին եւ հայոց պետական աւագանուն։ Ողջոյն ենք յղում Լեռնային Ղարաբաղի Հանրապետութեան Նախագահ Տիար Բակօ Սահակեանին։ Հայրապետական Մեր օրհնութիւնն ու սէրն ենք բերում մեր Եկեղեցու ուխտապահ հոգեւոր դասին եւ ի սփիւռս աշխարհի համայն մեր ժողովրդին: Տիրոջ ամենառատ շնորհները մաղթելով՝ ողջոյն ենք յղում Քոյր Եկեղեցիների հոգեւոր պետերին, Հայաստանում հաւատարմագրուած դիւանագիտական առաքելութիւնների ղեկավարներին ու ներկայացուցիչներին:
Սիրելի եղբայրներ եւ քոյրեր, այսօր աւետաբեր հրեշտակի ձայնն է հնչում մեր հոգիներին. «ծնուեց ձեզ Փրկիչ, որ օծեալ Տէրն է»։ Ելնենք Տիրոջն ընդառաջ՝ ինչպէս մոգերն ու հովիւները, Բեթղէհէմեան մսուր դարձնենք մեր հոգիները՝ ընդունելու Մանուկ Յիսուսին։ Նորածին Փրկչի սնարի առջեւ աղօթք բարձրացնենք, որ երկնային շնորհներով զօրանան երկրի վրայ խաղաղութեան, մարդկանց մէջ հաճութեան ուղիները, եւ մեր կեանքից չպակասի Աստծոյ ներկայութիւնը սրտով զգալու եւ հոգով ճանաչելու զօրութիւնը, որպէսզի միշտ ցնծան մեր հոգիները, եւ մեր շուրթերը փառաբանութեամբ հնչեցնեն շնորհաբեր բարի լուրը.
Քրիստոս ծնաւ եւ յայտնեցաւ
Ձեզ եւ մեզ մեծ աւետիս։
Շնորհք, սէր եւ խաղաղութիւն Տեառն մերոյ Յիսուսի Քրիստոսի եղիցին ընդ մեզ եւ ընդ ամենեսեանն. ամէն։
Սուրբ Էջմիածին,
6 Յունուարի, 2011 թ.
