Այս տարուան «Արմինիըն Տրամաթիք Արթս Ալայընս»ի (Armenian Dramatic Arts Alliance-ADAA) տարեկան 3րդ Պոսթընի Հայկական շարժապատկերի փառատօնին (3rd Annual Boston Armenian Film Festival), որ տեղի պիտի ունեանայ Մայիս 29-31, Պոսթընի մէջ, պիտի ներկայացուի ֆրանսահայ շարժապատկերի բեմադրիչ Ռոպեր Կէտիկեանի վերջին ֆիլմը՝ «Լ՛Արմէ Տիւ Քրիմ»ը («Ոճիրի Բանակը»-L’Armee du Crime-Army of Crime):
Նոյնպէս, այս տարուան Լոս Անճելըս ֆիլմի փառատօնը (Los Angeles Film Festival), որ պիտի կայանայ Յունիս 17-27, Տաուն Թաուն Լոս Անճելըսի LA Live-ի «Ռիկըլ» սրահներուն մէջ, պիտի ներկայացնէ Ռոպեր Կէտիկեանի նշեալ ժապաւէնը, զոր կը հովանաւորէ «Արմինիըն Տրամաթիք Արթս Ալայընս»ը:
«Լ՛Արմէ Տիւ Քրիմ» ժապաւէնի գլխաւոր դերակատարն է ֆրանսահայ վաստակաւոր դերասան Սիմոն Աբգարեանը, որ ստանձնած է Բ. Համաշխարհային պատերազմի ժամանակ ֆրանսական «Ռեզիսթանս»ի հերոսներէն՝ Միսակ Մանուշեանի դերը, իսկ վերջինիս կնոջ՝ Մելինէի, դերը կը կատարէ ֆրանսացի հանրայայտ դերասանուհի Վիրժինի Լըտուայենը: Ժապաւէնին մէջ կը խաղայ նաեւ Ռ. Կէտիկեանի կինը՝ Արիան Ասքարիտ:
Լոս Անճելըս ֆիլմի փառատօնի ծիրէն ներս, «Լ՛Արմէ Տիւ Քրիմ» ժապաւէնի ցուցադրութիւնը տեղի պիտի ունենայ Ուրբաթ, Յունիս 25ի երեկոյեան ժամը 8ին եւ Կիրակի, Յունիս 27ին կէսօրէն ետք ժամը 1ին:
——————————————————————————————————————-
ՌՈՊԵՐ ԿԷՏԻԿԵԱՆ
Ծնած է Դեկտեմբեր 3, 1953ին, Ֆրանսայի Մարսէյ քաղաքը, հայ հօրմէ եւ գերմանացի մօրմէ: Շատ կանուխ հասակին հետաքրքրութիւն կը ցուցաբերէ մասնաւորապէս Մարսէյի մէջ տեղի ունեցող աշխատաւորական շարժումին եւ ընդհանրապէս քաղաքականութեան հանդէպ: Առ այդ, կը հետեւի ընկերաբանութեան ճիւղին, Էքս Ան Փրովանսի համալսարանէն ներս, ուր կը հանդիպի Արիան Ասքարիտի (ներկայիս՝ անոր կինը): Ուսումը աւարտելէ ետք, քաղաքականութենէն յուսախափ՝ ֆիլմարուեստին մէջ կը գտնէ իր սրտին մօտիկ նիւթերը (աշխատաւորներուն դատը) արծարծելու նոր միջոց, եւ 1981ին կը բեմադրէ իր առաջին ֆիլմը՝ «Տերնիէր Էթէ»ն, դերասան ունենալով իր կինը եւ Ժերար Մէյլանը, որոնք դերեր կը ստանձնեն իր յետագայի բոլոր ժապաւէններուն մէջ:
Ներգաղթը եւ Մարսէյի Էսթաք արուարձանը իր ժապաւէններու նիւթերուն առանցքը կը կազմեն, սակայն ան բեմադրած է նաեւ «մութ տրամաներ»: Ան որոշ ժամանակ մը նկատուած էր տեղական-շրջանային (Մարսէյ) շարժապատկերի բեմադրիչ, բայց 1997ին, «Մարյուս Է Ժանէթ» (Marius et Jeannette) իր հանրայայտ ժապաւէնով, ան ստացաւ ֆրանսական եւ համաշխարհային մակարդակի հռչակ: 2006ին բեմադրուած «Լը Վուայաժ ան Արմէնի»ն (Le Voyage en Armenie), Կէտիկեանի առաջին ֆիլմն է, որ Հայաստանի ու հայութեան հետ ուղղակի կապ ունի:
Ռոպեր Կէտիկեանի Ժապաւէններու ցանկը.
«Լ՛Արմէ տիւ Քրիմ» (L’Armee du Crime), 2009
«Լէյտի Ճէյն» (Lady Jane), 2008
«Լը Վուայաժ ան Արմէնի» (Le Voyage en Armenie), 2006
«Լը Փրոմընէօր տիւ Շան տը Մարս» (Le Promeneur du Champ de Mars), 2005
«Մոն Փեր էթ Էնժէնէօր» (Mon Pere est Engenieur), 2004
«Մարի-Ժօ է սէ 2 Ամուր» (Marie-Jo et ses 2 Amours), 2002
«Լա Վի է Թրանքիլ» (La Vie est Tranquille), 2000
«Ա Լ՛Աթաք» (A L’Attaque), 2000
«Ա լա փլաս տիւ Քէօր» (A la Place du Coeur), 1998
«Մարիւս է Ժանէթ» (Marius et Jeannette), 1997
«Ա լա Վի, Ա լա Մօր» (A la Vie, A la Mort), 1995
«Լ՛Արժան ֆէ լը Պօնէօր» (L’argent fait le Bonheur), 1993
«Տիէօ Վոմի լէ Թիետ» (Dieu Vomit les Tiedes), 1989
«Ռուժ Միտի» (Rouge Midi), 1985
«Քի Լօ Սա՞» (Ki Lo Sa?) 1985
«Տերնիէր Էթէ» (Dernier Ete), 1981
——————————————————————————————————————–
ՍԻՄՈՆ ԱԲԳԱՐԵԱՆ
Ծնած է Մարտ 5, 1962ին, Ֆրանսայի Կոնես քաղաքը, եւ հասակ նետած՝ Լիբանանի եւ Ֆրանսայի մէջ: Ան պատրաստուած է իբրեւ պարող, եւ մաս կազած է Պէյրութի «Լոռի» եւ Նիւ Եորքի «Անդրանիկ» պարախումբերուն: Ան նաեւ մաս կազմած է Լոս Անճելըսի մէջ Ճորճ Պիկոթի «Դիմակային աշխատանք»ին (mask work) եւ «Քոմետիա տել՛Արթէ»ին: Երկարատեւ համագործակցութիւն ունեցած է Արիան Մուշքինի եւ «Թէաթր տիւ Սոլէյ»ի հետ՝ գլխաւոր դերեր ստանձնելով յունական ողբերգութիւններու ներկայացումներու մէջ, այնտեղ ցուցաբերելով շնորհալի ձիրք: 2001ին, Սիմոն Աբգարեան կը ստանայ «Մոլիէր» մրցանակը (Prix Moliere), որ ֆրանսական թատրոնի դերասանի մը համար մեծագոյն մրցանակն է, «Իւն Պէթ Սիւր լա Լիւն» (Une Bete Sur la Lune) թատերախաղին մէջ իր ստանձնած դերին համար: Ս. Աբգարեան նաեւ բեմադրած է շարք մը թատերախաղեր, ընդ որում՝ «Թիթիւս Անտրոնիքիւս»ի (Titus Andronicus) 2003ի հանրայայտ ներկայացումը:
Հռչակաւոր բեմադրիչ Սալի Փօթըրի «Ես» (Yes, 2004) ժապաւէնը Սիմոն Աբգարեանի անգլերէնով առաջին գլխաւոր գործն է:
Սիմոն Աբգարեան դերեր ստանձնած է հետեւեալ ժապաւէններուն մէջ.
«Լ՛Արմէ տիւ Քրիմ» (L’Armee du Crime), 2009
«Ռէյճ» (Rage), 2009
«Լը Շան Տէ Մարիէ» (Le Chant des Mariees), 2008
«Միւզէ Հօ, Միւզէ Պա» (Musee Haut, Musee Bas), 2008
«Սըգրէ Տեֆանս» (Secret Defense), 2008
«Խամսա» (Khamsa), 2008
«Շիվա» (Shiva), 2008
«Ռենտիշըն» (Rendition), 2007
«Լա Տիսփարիւ տը Տէօվիլ» (La Disparue de Deauville), 2007
«Րիքոն՝ Է Ֆիլմմէյքըր՛զ Քուէսթ» (Recon: A Filmmaker’s Quest), 2007
«Քազինօ Ռուայալ» (Casino Royale), 2006
«Լը Սերփան» (Le Serpent), 2006
«Հիէր Անքոր» (Hier Encore), 2006
«Ժ՛է Վիւ Թիւէ Պեն Պարքա» (J’ai Vu Tuer Ben Barka), 2005
«Զէյնա, Քաւալիեր տը L՛Աթլաս» (Zaina, Cavaliere de L’Atlas), 2005
«Լը Տեմոն տը Միտի» (Le Demon de Midi), 2005
«Տան Թէ Ռեւ» (Dans Tes Reves), 2005
«Լէ Մովէ Ժուէօր» (Les Mauvais Joueurs), 2005
«Վէ՛Լախթա Լեհէ Իշա» (Ve’Lakhta Lehe Isha), 2004
«Ես» (Yes), 2004
«Արամ» (Aram), 2002
«Տը Թրութ Ըպաութ Չարլի» (The Truth About Charlie), 2002
«Արարատ» (Ararat), 2002
«Լիլա Լիլի» (Lila Lili), 1999
«Շաքան Շերշ Սոն Շա» (Chacun Cherche Son Chat), 1996
