Ալէն Սիմոնեանի՝ Արցախցիներուն Հասցէին Կատարած Յայտարարութիւնները Խստօրէն Դատապարտուեցան

-ԱՐՑԱԽԻ ՆԱԽԱԳԱՀԸ ՍԻՄՈՆԵԱՆԷՆ ՊԱՀԱՆՋԵՑ ՆԵՐՈՂՈՒԹԻՒՆ ԽՆԴՐԵԼ ԱՐՑԱԽԻ ՏԵՂԱՀԱՆՈՒԱԾ ԺՈՂՈՎՈՒՐԴԷՆ
–ՊԱՏՄՈՒԹԵԱՆ ՄԷՋ ԱՅՍ ԱՄԷՆԸ ՄՆԱԼՈՒ Է ՈՐՊԷՍ ՍԵՒ ԲԻԾ. ՀՅԴ ԱՐՑԱԽԻ ԿԿ
–ԻՐԱԿԱՆՈՒԹԵԱՆ ՈՐԵՒԷ ԽԵՂԱԹԻՒՐՈՒՄ ԴԱՏԱՊԱՐՏԵԼԻ Է. ԱՐՑԱԽԻ ԹԵՄ

ԱՐՑԱԽԻ ՆԱԽԱԳԱՀԸ ՍԻՄՈՆԵԱՆԷՆ ՊԱՀԱՆՋԵՑ ՆԵՐՈՂՈՒԹԻՒՆ ԽՆԴՐԵԼ ԱՐՑԱԽԻ ՏԵՂԱՀԱՆՈՒԱԾ ԺՈՂՈՎՈՒՐԴԷՆ

Արցախի վերջին նախագահ Սամուէլ Շահրամանեան 12 Փետրուարին դատապարտեց Հայաստանի Ազգային ժողովի նախագահին 11 Փետրուարին կատարած յայտարարութիւնները եւ պահանջեց, որ ան հրապարակաւ ներողութիւն խնդրէ Արցախի տեղահանուած ժողովուրդէն: Արցախի տեղեկատուական շտաբը այս առիթով հրապարակեց հետեւեալ յայտարարութիւնը.

«Արցախի Հանրապետութեան նախագահ Սամուէլ Շահրամանեանը խիստ դատապարտում է ՀՀ ԱԺ նախագահ Ալէն Սիմոնեանի կողմից երէկ խորհրդարանի բարձր ամբիոնից եւ լրագրողների հետ ճեպազրոյցում հնչեցուած գնահատականները` կապուած արցախցիների պայքարի, հայրենիքի պաշտպանութեան եւ Արցախի իշխանութիւնների գործողութիւնների հետ, որով փոթորկել է Արցախի բռնի տեղահանուած ժողովրդի` առանց այն էլ չխաղաղուող հոգիները:

«Այս յայտարարութեամբ Ալէն Սիմոնեանը փորձել է նուաստացնել Արցախի ժողովրդի հերոսական պայքարն աւելի քան 9ամսեայ պաշարման եւ դրանից յետոյ վրայ հասած լայնածաւալ ռազմական գործողութիւնների ժամանակ:

«Սամուէլ Շահրամանեանը հարկ է համարում եւս մէկ անգամ ընդգծել, որ արցախցին արել է իրենից կախուած ամէն բան, որ շարունակի ապրել պատմական հայրենիքում, սակայն, կռիւը չի տարւում միայն մարտի դաշտում, այլեւ քաղաքական ու դիւանագիտական ճակատներում, որի առաջնագծում է նաեւ Ալէն Սիմոնեանը, ով տարբեր ժամանակահատուածներում, ելնելով քաղաքական եւ այլ նպատակայարմարութիւնից, Արցախի եւ Հայաստանի համար կարեւորագոյն հարցերում փոխել է իր կարծիքն ու դիրքորոշումը:

«Արցախի իշխանութիւնները ոչինչ չեն խնայել, որ հայրենիքը պաշտպանած զինծառայողներն իրենց միայնակ չզգան եւ ռազմական գործողութիւնների դադարից յետոյ կարողանան անվնաս դուրս գալ զբաղեցրած դիրքից կամ շրջափակումից:

«Արցախի Հանրապետութեան նախագահը պահանջում է ՀՀ ԱԺ նախագահ Ալէն Սիմոնեանից` հրապարակային ներողութիւն խնդրել Արցախի տեղահանուած ժողովրդից եւ զերծ մնալ արցախցիների պայքարն ու հայրենիքի պաշտպանութիւնը սակարկման ենթարկող որեւէ գնահատականից` միաժամանակ մեկնաբանել սեփական յայտարարութիւնը, թէ ով եւ ում էր զանգում Արցախից ու խնդրում բացել այսպէս կոչուած սահմանը:

«Հաշուի առնելով արցախցիների շրջանում Ալէն Սիմոնեանի յայտարարութեան լայն բացասական արձագանգը` Սամուէլ Շահրամանեանը յորդորում է պառակտիչ եւ վտանգաւոր յայտարարութիւնների փոխարէն ՀՀ Ազգային ժողովի բարձր ամբիոնն օգտագործել արցախահայութեան գոյաբանական խնդիրների լուծման համար, ամբողջ էներգիան (ներուժը) ու ջանքերն ուղղել արցախցի քոյրերին եւ եղբայրներին առաջարկուող բնակարանային ապահովման տապալուած ծրագրի վերանայմանը եւ բաւարար պայմաններ ստեղծել, որ արցախցիները մնան Մայր Հայաստանում»:

Յիշեցնենք, որ Ալէն Սիմոնեան արցախցիները մեղադրած էր վերջին պատերազմին ատրպէյճանցիներուն դէմ չկռուելու մէջ: «Դուք երբ որ դուրս եկաք ըտեղից, դուրս եկաք ըտեղից, որովհետեւ անվտանգ չէր: Չնայած կարելի էր մնալ եւ պայքարել մինչեւ վերջ, բայց դուրս եկաք», ըսած էր ան` շարունակելով. «Էն զէնքերով (պայքարել), որը որ Հայաստանի Հանրապետութիւնը իրա ամբողջ բանով թողել եւ տուել էր»:

ՊԱՏՄՈՒԹԵԱՆ ՄԷՋ ԱՅՍ ԱՄԷՆԸ ՄՆԱԼՈՒ Է ՈՐՊԷՍ ՍԵՒ ԲԻԾ. ՀՅԴ ԱՐՑԱԽԻ ԿԿ

ՀՅԴ Արցախի Կեդրոնական կոմիտէն եւս իր հրապարակած յայտարարութեան միջոցով դատապարտեց Ալէն Սիմոնեանի վերջին երկու օրերուն կատարած յայտարարութիւնները, որոնք կը ժխտեն հայ ժողովուրդի հերոսական պայքարի պանծալի դրուագները:

«Գաղափարազուրկ անհատների մօտ սեփական փոքրոգութիւնը, պատմութեան առջեւ յանցանքի խարանը մաքրելու ապարդիւն փորձերը` բացայայտում են այդ մարդուկների իրական պատկերը:

«Ցաւալի է, որ հայրենի իշխանութեան աթոռներին յոխորտալով բազմած այդ մարդուկներին է վստահուած միջազգային հարթակներում ներկայացնելու մեր պետութիւնը:

«Անարժանապատուութիւնը նման մարդկանց հոգու խորքում է: Հայոց պետականութեան պատմութեան մէջ այս ամէնը մնալու է որպէս սեւ բիծ, ամօթալի յիշատակումներ, որոնք սերունդների մօտ օրինակ են ծառայելու` որպէս հայրենիքի ուրացման ապացոյց:

«Սա եւս մէկ փաստ է, որ ՀՀ գործող իշխանութիւնները ոչ միայն չեն ներկայացնում հայ ժողովրդի իդէալները, այլ ծառայում են Հայաստանի դէմ թշնամական տրամադրութիւններ ունեցող ուժերին եւ քարոզում նրանց գաղափարախօսութիւնը:

«Կամք եւ վճռակամութիւն է պէտք, որպէսզի պատմութեան աղբարկղ նետուեն այդ մարդուկները», կ՛ըսուի ՀՅԴ Արցախի Կեդրոնական կոմիտէի վերոնշեալ հաղորդագրութեան մէջ։

ԻՐԱԿԱՆՈՒԹԵԱՆ ՈՐԵՒԷ ԽԵՂԱԹԻՒՐՈՒՄ ԴԱՏԱՊԱՐՏԵԼԻ Է. ԱՐՑԱԽԻ ԹԵՄ

Հայ առաքելական եկեղեցւոյ Արցախի թեմը նոյնպէս անընդունելի նկատեց արցախահայութեան հասցէին եղած այս յայտարարութիւնները եւ հրապարակեց հետեւեալ հաղորդագրութիւնը.

«Ցաւալի է ՀՀ ԱԺ նախագահի յոյժ պատասխանատու կոչումը ունեցող պաշտօնեայից այդպիսի անպատասխանատու յայտարարութիւններ լսելը Արցախի եւ արցախահայութեան մասին: Նման անհեռատես եւ յաւակնոտ խօսքերը ոչ միայն չեն կարող նպաստել հայրենական կեանքում առկայ խնդիրների լուծմանը, մեզ օդ ու ջրի պէս այդքան անհրաժեշտ ազգային միասնութեան ապահովմանը, այլեւ ճիշդ հակառակը, դրանք առաւելագոյնս խորացնում են մեր ժողովրդի մէջ արհեստականօրէն ներդրուած հատուածականութեան բաժանարար գծերը:

«Աւելին, հոգեւոր տեսողութիւն եւ ընկալում ունեցող մարդկանց համար յստակ տեսանելի են այդպիսի վարքագծի բուն պատճառները: Դրախտում առաջին մարդկանց գործած ամենամեծ մեղքը եղաւ ոչ թէ արգելուած պտուղն ուտելը, այլ Աստծոյ հարցմանն ի պատասխան մեղքը իրենց վրայից ուրիշի վրայ գցելը եւ չզղջալը: Այս երեւոյթը ներկայ է մարդկութեան պատմութեան ողջ ընթացքում եւ դրա յաղթահարումը հնարաւոր է միայն քրիստոնէութեան ճանապարհով, որ սովորեցնում է առաջին հերթին տեսնել մեր մեղքը եւ պատասխանատու լինել մեր քայլերի համար: Արցախեան 44օրեայ պատերազմից յետոյ, Արցախի 9-ամսեայ շրջափակման ընթացքին եւ 2023 թ. բռնի տեղահանումից յետոյ մեր ժողովրդի մի ստուար հատուածի մօտ ցաւալիօրէն արմատացել է մեղքն ու պատասխանատուութիւնը իրենցից հեռացնելու կործանարար մօտեցումը, ինչի համար հիմք են ծառայել ամենաբարձր մակարդակով բազմիցս արուած նման անհեռատես ու պառակտիչ յայտարարութիւնները, իսկ ԱԺ նախագահի վերջին յայտարարութիւնը ընդամէնը թարմացումն էր վերոնշեալ մօտեցման:

«Հարկ չենք համարում մանրամասն կերպով վերստին անդրադառնալու, թէ 9ամսեայ շրջափակման նեղութիւնները կրած մեր ժողովուրդը ինչպիսի հերոսական դիմադրութիւն ցոյց տուեց 2023 թ. Սեպտեմբերի 19ին, որովհետեւ համաձայն սուրբգրային խօսքի՝ «Ով աչք ունի տեսնելու, կը տեսնի», իսկ ով ցանկութիւն չունի իրականութիւնը տեսնելու, երբեք էլ չի տեսնի: Բայց ամենամեծ ցաւն այն է, որ իրականութիւնը լաւագոյնս իմացող, 2023 թ. Արցախին օգնելուց պաշտօնապէս հրաժարուած անձինք չեն վարանում վերստին խեղաթիւրելու իրականութիւնը` նորից ու նորից աղ լցնելով հայրենազուրկ արցախցիների չսպիացած վէրքերին, անտեսելով նաեւ 2023 թուականին նահատակուած հարիւրաւոր մեր տղաների սխրանքը:

«Աղօթում ենք, որ Աստուած իմաստութիւն տա մեր ժողովրդին, որպէսզի ոչինչ ու ոչ ոք պատճառ չդառնան արհեստական լարուածութեան ու իրար հանդէպ անհանդուրժողականութեան: Ինչքան որ զօրանայ սէրը, ներողամտութիւնը եւ միասնութիւնը մեր հայրենիքում, այնքան աւելի շուտ կը կատարուեն մեր բոլոր նուիրական իղձերն ու երազանքները, որը վստահ ենք, որ ամէն մի հայի ցանկութիւնն է»:

«ԱՐՑԱԽՑԻՆԵՐԸ ՍՊԱՐՏԱՑԻՆԵՐԻ ՆՄԱՆ ՊԷՏՔ Է ՄՆԱՅԻՆ ՈՒ 120 ՀԱԶԱՐՆ ԷԼ ԶՈՀՈՒԷԻ՞Ն». ԱՐՄԷՆ ՌՈՒՍՏԱՄԵԱՆ

Ազգային ժողովի «Հայաստան» խմբակցութեան պատգամաւոր, ՀՅԴ Բիւրոյի քաղաքական ներկայացուցիչ Արմէն Ռուստամեան 12 Փետրուարին լրագրողներու հետ ունեցած զրոյցին ընթացքին անդրադարձաւ Ալէն Սիմոնեանի` արցախցիներուն մասին յայտարարութիւններուն:

«Արցախահայութիւնը գիտի, թէ ինչ է արել: Այս իշխանութիւնները չեն հասկանում, որ իրավիճակը կտրուկ փոխուել է, իրենց յայտարարութիւններն այլեւս ոչ ոք լուրջ չի ընդունում կամ ինչ-որ նեղ շրջանակ է լուրջ ընդունում: Նոյն արցախահայերը լսում են, չէ՞, թէ այս մարդն ինչ է ասում, նրանք գիտեն` իրականում ի՞նչ է տեղի ունեցել, իրական վկաներ են այդ մարդիկ: Ո՞նց կարելի է այդ մարդկանց աչքերին նայելով ասել` դուք էք մեղաւոր: Ասում է` արցախցիներն են մեղաւոր, որ չեն կռուել մինչեւ վերջ: Այսինքն` սպարտացիների նման պէտք է մնային ու 120 հազարն էլ զոհուէին, հա՞», ըսաւ Ռուստամեան:

Պատասխանելով այն հարցումին, որ Սիմոնեան կը շեշտէ, որ քաղաքական իշխանութիւնը նկատի ունի՝ Ռուստամեան դիտել տուաւ, որ քաղաքական իշխանութիւնը ժողովուրդէն կտրուած չէ, ժողովուրդը ընտրած է զայն:

«Արայիկ Յարութիւնեանն իր պաշտօնից փախաւ, իշխանութիւնը մնաց անտէր, այդ անտէր վիճակը չեն թողել, որ մնայ: Դրօշը գցել էին փողոցում, դրօշը վերցնող էր պէտք, դրօշը վերցրել են այդ մարդիկ: Հիմա նրանց մեղադրում են նրա համար, որ տէր են կանգնել, անտէր չեն թողել ժողովրդին: Դա էլ եթէ չլինէր, անիշխանութիւնն աւելի վատ էր», ըսաւ Ռուստամեան:

Ան աւելցուց, որ Նիկոլ Փաշինեան արդէն հասկցած է` Պաքուի մէջ ընթացող կեղծ դատավարութիւնները Հայաստանի ու Հայաստանի իշխանութեան դէմ են: «Ռուբէն Վարդանեանին ու միւսներին վարկաբեկում էին, ասում էին` հլա հարց է, թէ ով է, ինչո՞ւ է եկել: Հիմա հասկացան, որ այդ դատավարութիւնը Ռուբէն Վարդանեանի ու միւսների նկատմամբ չէ, Հայաստանի նկատմամբ է, Արցախի նկատմամբ է, Արցախի ինքնորոշման իրաւունքի դէմ է: Հիմա սկսել են ամէն տեղ գրել, որ շինծու դատավարութիւններ են տեղի ունենում, որովհետեւ հասկացան, որ այդ դատավարութիւնների թիրախն իրենք են: Քանի դեռ իր մաշկին չհասաւ վտանգը, հասկացաւ, որ չի կարելի այդ մարդկանց քաւութեան նոխազ համարել: Ադրբեջանը շատ յստակ ծրագիր է իրականացնում, ինքը Հայաստանը դիտելու է որպէս ագրեսոր, որովհետեւ Նիկոլ Փաշինեանը գնացել ասել է` Արցախ չկայ: Նիկոլ Փաշինեանը, դուրս մղելով Արցախին, ինքն է եկել մէջտեղ, դա այն է, ինչ ուզել է Ալիեւը: Արցախի գործօնը վերացնելով` Հայաստանն ամբողջ պատասխանատուութիւնը վերցրել է իր վրայ: Եւ պատերազմի հետ կապուած ամբողջ պատասխանատուութիւնն ուղղուել է Հայաստանին ու Հայաստանի իշխանութիւններին», ըսաւ Ռուստամեան։