Ադրբեջանի մայրաքաղաք Բաքուում աւարտուել է Զինուած ուժերի օրուան նուիրուած զօրահանդէսը:
Ինչպէս հաղորդում է ադրբեջանական APA գործակալութիւնը, զօրահանդէսին մասնակցել են Ադրբեջանի պաշտպանութեան նախարարութեան զինուորական ստորաբաժանումների հրամանատարների, խաղաղապահ ուժերի, յատուկ նշանակութեան զօրքերի, ծովային հետեւակազօրի, պետական սահմանապահ ծառայութեան, ՆԳՆ ներքին զօրքերի, պետական պահպանութեան յատուկ ծառայութեան, արտակարգ իրավիճակների նախարարութեան Քաղաքացիական պաշտպանութեան զօրքերի անձնակազմերը, ինչպէս նաեւ ռազմական ուսումնական հաստատութիւնների սաները (ընդհանուր առմամբ՝ աւելի քան 5000 մարդ):
Զինուած ուժերի 95ամեակի կապակցութեամբ (Ադրբեջանում Զինուած ուժերի կազմաւորման օր է համարւում 1918թ. Յունիսի 26ը, երբ նորանկախ Ադրբեջանում (անկախութիւնը հռչակել էր 1918թ. Մայիսի 27ին, Անդրկովկասեան սէյմի լուծարումից յետոյ) ստեղծուեցին Զինուորական նախարարութիւն, առաջին զօրամիաւորումը եւ զօրակոչ յայտարարուեց-Tert.am) անցկացուած ռազմական շքերթի ժամանակ ներկայացուել են «Միգ 29», «Սու 25», «Լ 39» ուսումնական եւ ռազմական ինքնաթիռներ, «Մի 24», «Մի 8/17», «Մի 35մ.», «ԿԱ 32» եւ «Մի 8» ուղղաթիռներ:
Բաքուի կենտրոնով անցել են նաեւ Ադրբեջանի պաշտպանական արդիւնաբերութեան նախարարութեան արտադրութեան «Գիւրզա» պարեկային մեքենան եւ «Մատադոր» ու «Մարոդեր» տեսակի հակաականային պաշտպանութեան զրահամեքենաները: APA-ի հաղորդմամբ՝ «Գիւրզա» պարեկային մեքենան, որ յագեցած է գնդացիրներով, առաջին անգամ ցուցադրուել է զօրահանդէսի ժամանակ:
Ռազմական շքերթին մասնակցել են նաեւ «Կոբրա», «Սթորմ», «Լենդ ռովեր դեֆենդեր», ZPT զրահապատ եւ ոչ զրահապատ մարտական մեքենաներ, «Օրբիտեր-2մ.» եւ «Աէրօսթար» անօդաչու թռչող սարքեր, 120 մմ. տրամաչափի «Կարդոմ» աւտոմատ ականանետներ (իսրայէլեան արտադրութեան), «Սաքարեա» (TR-122, 122 մմ. տրամաչափի), «Սմեր»չ տեսակի համազարկային կրակի համակարգեր, «Գւոզդիկա», «Պիոն», «Մստա-Ս» ինքնագնաց հաուբիցներ, ինչպէս նաեւ «ԲՄՊ- 2» եւ «ԲՄՊ-3» հետեւակի մարտական մեքենաներ, «Սօլցեպեկ», «Տոս1ա» ռէակտիւ հրանետ, արդիականացուած Տ-72 «Ասլան» տանկեր, Ադրբեջանի զինուած ուժերի զինանոցը վերջերս համալրած «Տ-90» տանկեր, «Ս-300», «Պմու-2 Ֆաւորիտ», «Ստրելա 10», «Ս-200», «Ս-300», «Բուկ ՄԲ», «Պեչերա» զենիթահրթիռային համալիրներ:
